Rama: Vijon puna për shëtitoren e Tushemishtit, përfundon aksi rrugor deri në Doganë

Kryeministri Edi Rama, thotë se puna për ndërtimin e shëtitores së Tushemishtit në Pogradec vijon, teksa ka përfunduar segmenti rrugor që lidh Tushemishtin me Doganën. Rama ndau sot foto nga punimet për këtë projekt. Ky projekt i cili reflekton përkushtimin për zhvillimin e qëndrueshëm dhe miqësor me natyrën, gërsheton turizmin e qëndrueshëm në harmoni me rregullat e konservimit të këtij parku natyror.

Drilon-Tushemisht ndodhet në një hapësirë e vogël gjeografike, ku ndërthuren me shumë hijeshi disa nga perlat e natyrës shqiptare si: burimet e Drilonit, liqeni i Pogradecit, shtëpitë karakteristike të zonës, rrugë të ngushta kalimi dhe peizazhe piktoreske, të cilat krijojnë një oaz të mrekullueshëm me mundësi të shumta për zhvillimin e turizmit në zonë.

Ky projekt lejon që vizitorët të mos shëtisin vetëm në pedonalen e Drilonit, por përmes kalimeve kryesisht këmbësore, të shkohet deri tek burimet e Drilonit dhe në Tushemisht. Çdo ndërhyrje, është kryer me metoda miqësore ndaj mjedisit, duke mbrojtur biodiversitetin.