Saimir Tahiri: Për mua është njëlloj, si arrest shtëpie, si në burg

Saimir Tahiri është parë sot në dyert e gjykatës, i shoqëruar nga eskorta e policisë ku do të marrë edhe masën e sigurisë. Avokati i tij, Maks Haxhia tha se sot do të kërkohet revokimi i masës së sigurisë, pasi nuk ka prova për të. Edhe në gjykatë ish-ministri nuk ka hyrë nga dera kryesore, duke qëndruar larg fokusit të medias.

Të shtunën ndaj ish ministrit të Brendshëm u vendos masa arrest shtëpie, teksa ndaj tij rëndojnë akuzat për trafik narkotikësh dhe korrupsion të zyrtarëve të lartë. Vendimi erdhi pothuajse dhjetë ditë pasi ai hoqi dorë nga mandati i deputetit.

Ndërkohë vetë Tahiri ka folur për gazetarët dhe është se shprehur se për të “është njëlloj, si arrest shtëpie, si arrest me burg”.

Gjatë seancës, ish-ministri ka replikuar me gjyqtaren e çështjes. Ai ka deklaruar se është gati të përballet me drejtësinë dhe nuk ka ndërmend të largohet. “Nuk kam ndërmend të largohem, jam gati të përballem me drejtësinë”.

Tahiri ka mohuar akuzat e prokurorëve Besim Hajdarmataj e Elisabeta Imeraj. Ish-ministri është shprehur se prokurorët e çështjes kanë abuzuar me faktet. “Abuzuan me faktet, shkruan fakte të gënjeshtërta në shkresë”,-ka deklaruar Tahiri.
VIDEO/Ish-ministri në Gjykatë