Shqiptari vjen nga Londra për protestën para Kryeministrisë

Naim Hasani është shqiptar që jeton në Londër, ku edhe është angazhuar për të drejtuar degën e Partisë Demokratike në kryeqytetin britanik. Ai ka mbërritur në Tiranë për t’ju bashkuar shqiptarëve në protestën e 16 marsit, që do të zhvillohet përpara Kryeministrisë.

“Vij nga Anglia për protestën, nesër Shqipëria do ndahet nga vjedhja, mashtrimi dhe manipulimi. Do ta bëjmë zërin tonë të dëgjohet fuqishëm në mënyrë paqësore”,- tha ai në rubrikën ‘Opinion’ në News 24.

Sipas tij ka ardhur koha që shqiptarët të mos i përfaqësojnë më në Parlament njerëz të lidhur me krimin dhe që ulen aty falë votave të blera.

“Ne presim nesër që shqiptarët të flasin qartë me zërin e demokracisë. Duam përfaqësim real në Parlamentku askush nuk duhet kurrë të pretendojë të marrë një post me vota që shiten e blihen. Kështu nuk na hapet kurrë dera e Evropës. Është politika ajo që na ka detyruar edhe neve të largohemi nga vendi ynë. Sa më shumë larg vendit tënd të rrish aq më shumë të shtohet atdhedashuria”, vijoi ai.

Hasani tha se është e nevojshme që në Shqipëri të bëhen disa ndryshime në Kodin Zgjedhor. Ai shprehu mendimin se se deputetët duhen zgjedhur përmes një sistemi proporcional.

Ardhjen e PD-së në pushtet e sheh si të vetmen mundësi, që siç tha, politika të ndahet nga krimi.

“Ardhja e PD në pushtet për një arsye madhore, që politika në Shqipëri të ndahet nga krimi. Një deputet që ka pasuri marramendëse duhet parë si e ka vënë në një kohë që ne jashtë as që mund ta ëndërrojmë me punë e profesione shumë të mira. Kurrë më vota e shqiptarëve as do shitet dhe as do blihet”,- u shpreh Hasani ndër të tjera.