Skandali në Butrint, PD-Kumbaros: Ndalo urgjent ndërtimet

Një skandal po konsiderohet situata në parkun arkeologjik të Butrintit. Mbi ndërtimet e lejuara nga Ministria e Kulturës, deputetja e Partisë Demokratike, Albana Vokshi, ka kërkuar sqarimin e plotë nga Mirela Kumbaro. Në një konferencë për shtyp nga selia blu, Vokshi u shpreh se PD po ndjek me vëmendje debatim për ndërtimet dhe tha se arkeologë e profesionistë të fushës kanë denoncuar këtë vendim.

“PD po ndjek me vëmendje debatin për ndërtimet e lejuara nga Mirela Kumbaro brenda parkut arkeologjik të Butrintit. Butrinti është vlerësuar si pasuri e trashgëimisë së njeriut. Ai ka mbrojtje nga UNESCO që nga 1992. Arkeologë e profesionistë të fushës kanë denoncuar vendimet e marra për një ndërtim nga Kumbaro pranë një muri prehistorik që daton në muajin e 7 para Krishtit ku ndërtimet janë të ndaluara”,-u shpreh Vokshi.

Më tej deputetja e PD-së theksoi se procedurat e lejimit janë në shkelje të plotë të ligjit dhe i shtroi disa pyetje ministres për të bërë transparencë të plotë për çështjen.

“Proceduart e lejimit janë në shkelje të plotë të ligjit dhe janë bërë brenda dy javëve. Pyesim ministren ç’është ky nxitim kaq i madh nga aprovimi, pse ministria refuzon të bëjë publik planin, sa është kostoja, a janë bërë gërmimet e detyrueshme para hedhjes së llaçit e ndërtimit, cili është destinacioni i ndërtimit dhe kush do e menaxhojë? A është aferë korruptive që do shkatërrojë vlerat e trashëgimisë kulturore për klientelën e qeverisë?,” pyeti Vokshi.

Kryetarja e komisionit të medias, i bëri thirrje Kumbaros që të ndalojë në mënyrë urgjente çdo ndërtim. “Ndalo në mënyrë urgjente çdo ndërtim deri në sqarim të plotë të gjithë kësaj çështje. Ne deputetët e PD kemi kërkuar dëgjesë urgjente me ministren Kumbaro nesër në orën 17’. Rast skandaloz,” tha Vokshi.