Brenda pesë viteve të ardhshme, tekstet shkollore në Shqipëri pritet të ndryshojnë ndjeshëm në funksion të përmbushjes së kritereve për anëtarësimin në Bashkimin Europian. Ministria e Arsimit ka miratuar programet e reja mësimore, të cilat do të shërbejnë si udhërrëfyes për hartuesit e teksteve dhe për mësuesit në procesin e përditësimit të kurrikulave në nivele të ndryshme arsimore.
Ekspertët e arsimit theksojnë se këto ndryshime duhet të jenë në përputhje me realitetin e nxënësve shqiptarë dhe jo thjesht kopje të modeleve europiane. Sipas Irsa Ruçit, eksperte e arsimit, Shqipëria ka kapacitetet njerëzore dhe intelektuale për të ndërtuar një sistem të vetin, që i përgjigjet nevojave të vendit, duke u bazuar në rekomandimet e Bashkimit Europian, por pa humbur identitetin arsimor kombëtar.
Një nga risitë kryesore të programeve të reja është përfshirja e teknologjisë në procesin mësimor. Dokumentet orientojnë përdorimin e internetit dhe të inteligjencës artificiale për të pasuruar njohuritë e nxënësve, për ta bërë mësimin më interaktiv dhe për të rritur motivimin e tyre. Edhe në lëndën e gjuhës shqipe, teknologjia shihet si mjet mbështetës për të zgjeruar burimet e të nxënit përtej tekstit shkollor.
Programi i përditësuar i gjuhës shqipe synon jo vetëm korrektësinë gramatikore, por edhe zhvillimin e aftësive komunikuese në situata të ndryshme shoqërore. Gjuha trajtohet si një shkencë që mban gjallë identitetin kulturor, duke u kërkuar nxënësve fillimisht ta kuptojnë strukturën e saj, e më pas ta përdorin në marrëdhënie njerëzore.
Risi tjetër e rëndësishme është qasja socio-emocionale në mësimdhënie, e cila synon zhvillimin e empatisë, edukimin qytetar dhe ndërtimin e një identiteti të vetëdijshëm te brezat e rinj, për t’i bërë ata më të mbrojtur dhe më aktivë në shoqërinë moderne.