Federata e Arteve Mikse Marciale e Kosovës (FAMMK) ka regjistruar një debutim të suksesshëm në Kampionatin Evropian të MMA-së, të organizuar nga “Global Association of Mixed Martial Arts” në Loutraki të Greqisë, duke siguruar tre medalje: një argjend dhe dy bronzi.
Suksesi më i madh erdhi nga Ermal Berisha në kategorinë -70 kg, i cili fitoi medaljen e argjendtë pas një rruge mbresëlënëse drejt finales. Berisha arriti dy fitore të rëndësishme gjatë garës, por nuk mundi të paraqitej në finalen e madhe për shkak të një prerjeje serioze në vetull, e cila u vlerësua nga stafi mjekësor si e papërshtatshme për vazhdim të garimit. Një tjetër rezultat pozitiv u arrit nga Ylli Rexhaj, i cili u stolis me medaljen e bronztë në kategorinë -80 kg, duke konfirmuar paraqitje solide dhe konkurruese në një nivel të lartë evropian.
Në garat e të rinjve, Muhamed Kashtanjeva solli gjithashtu medalje për Kosovën, duke fituar bronzin në kategorinë -58 kg, duke dëshmuar potencialin e brezit të ri në këtë sport. Ky debutim i suksesshëm i Kosovës në arenën evropiane të MMA-së konsiderohet një hap i rëndësishëm për zhvillimin e sportit në vend dhe një sinjal pozitiv për të ardhmen e arteve mikse marciale. Kontribut në rritjen e sportistëve çdo ditë e më shumë e ofron ”038 FIGHT CLUB”, i krijuar nga reperti i suksesshëm i skenës Capital T dhe që administrohet nga Diar Maliqi.
