Banane gjigante në Anfield, tifozët e Manchester City-t rikthejnë traditën e vjetër

Tifozët e Manchester Cityt tërhoqën vëmendjen gjatë fitores 3-0 ndaj Liverpoolit në Anfield, në një ndeshje të Premier League. Mbështetësit e skuadrës së Pep Guardiolës shfaqën banane gjigante të fryra dhe flamuj të verdhë në tribuna, në një skenë që u interpretua si një gjest ironik në një moment të vështirë për klubin anglez.

Rreth 100 tifozë të Cityt u dalluan në stadium, duke valëvitur flamuj të verdhë mbi një metër të gjatë gjatë gjithë takimit. Ata i ngritën veçanërisht gjatë festimeve për golat e skuadrës, përfshirë edhe realizimin e francezit Rayan Cherki.

Megjithatë, kjo traditë nuk është e re për tifozët e Manchester Cityt. Ajo i ka rrënjët në vitet 1980, kur mbështetësit anglezë nisën të përdornin figura të fryra në formë frutash dhe kafshësh, me synimin për të krijuar një atmosferë më argëtuese në stadiume dhe për të larguar imazhin negativ të lidhur me dhunën dhe huliganizmin.

Sipas rrëfimeve historike, tradita e bananeve gjigante nisi në gusht të vitit 1987, gjatë një ndeshjeje mes Manchester Cityt dhe Plymouthit në stadiumin Maine Road. Në atë takim, tifozi Frank Newton solli një banane të fryrë, mbi një metër e gjysmë të gjatë. Në atë periudhë, futbollisti i Cityt, Emre Varadi, u pagëzua me nofkën “Emre Banana”, për shkak të lidhjes së tij me këtë fenomen.

Por rikthimi i kësaj tradite vjen në një moment delikat për klubin. Manchester City përballet me akuza për rreth 100 shkelje të rënda të rregullave financiare të Premier League, që lidhen me periudhën 2009-2018.

Nëse shkeljet konfirmohen përmes procedurave përkatëse, klubi mund të përballet me sanksione të rënda, që mund të përfshijnë zbritje pikësh, gjoba të konsiderueshme apo edhe masa të tjera disiplinore.