Interi ka vendosur të ndërtojë të ardhmen rreth Cristian Chivu. Mbështetja për trajnerin rumun nuk vjen vetëm nga drejtuesit, por edhe nga vetë skuadra, e cila ka krijuar një raport të fortë me trajnerin. Ky bashkëpunim i suksesshëm ka qenë një nga faktorët kryesorë në rrugëtimin drejt titullit të 21-të kampion në Serie A.
Pas fitores vendimtare ndaj Parmës, presidenti Beppe Marotta e bëri të qartë qëndrimin e klubit: titulli i përket Chivu dhe skuadrës, ndërsa zgjedhja për ta emëruar atë në krye të pankinës u cilësua një vendim i guximshëm dhe i drejtë. Sipas Marottës, trajneri ka potencialin të qëndrojë për shumë vite në Milano.
Kontrata aktuale dyvjeçare, e firmosur në verën e vitit 2025, pritet të zgjatet deri në vitin 2028. Drejtuesit nuk dëshirojnë të hyjnë në sezonin e ri me një trajner në skadencë kontrate dhe po përgatisin një marrëveshje të re me përmirësim page, nga 2.5 në 3.5 milionë euro në sezon.
Ndërkohë, Chivu do të ketë një rol vendimtar edhe në ndërtimin e skuadrës së re. Me një grup që kërkon rinovim për shkak të moshës, merkatoja e verës shihet si hapi i parë drejt transformimit të organikës.
Në listën e objektivave të merkatos janë disa emra konkretë. Mesfushori Manu Koné, aktualisht te Roma, mbetet një profil i pëlqyer për forcimin e mesfushës me energji dhe fizik. Gjithashtu, interes ka për anësorin Marco Palestra nga Cagliari Calcio, i konsideruar një investim për të tashmen dhe të ardhmen.
Sa i përket repartit defensiv, më afër duket mbrojtësi boshnjak Tarek Muharemovic, i cili pritet të largohet nga US Sassuolo. Në anën tjetër, pista që lidhet me talentin argjentinas Nico Paz mbetet e komplikuar, pasi gjithçka varet nga vendimet e Real Madrid për të ardhmen e lojtarit.