Duka “thumbon” nga Andorra: Në Shqipëri lejojnë praninë e spektatorëve në mitingje politike!

Presidenti i FSHF-së, Armand Duka, foli para sfidës me Andorrën, teksa nuk i kurseu “thumbimet” ndaj qeverisë për praninë e tifozëve ndaj Anglisë.

“Ne akoma s’kemi asnjë përgjigje pozitive. Çdo vend ka rregullat e veta, në Shqipëri lejojnë praninë e spektatorëve në mitingje politike. Kemi pasur një shkresë zyrtare nga drejtoria e policisë të Tiranës, ku thuhej se Policia nuk do të jetë pjesë e organizimit të ndeshjes. Reagimi i tyre ka qenë i menjëhershëm dhe kanë thënë që ka qenë një keqkuptim. Jam i sigurt që Policia do ta ketë më seriozisht.

Kemi një stadium që plotëson të gjitha kriteret për të respektuar protokollet. Nëse do të kishim pak spektatorë, nuk ka asnjë risk. Risku është shumë herë më minimal se jeta e shqiptarëve, në mitingje, bare dhe restorante, ku nuk ka asnjë protokoll të respektuar. Të jesh ekstremist në një ndeshje që nuk vjen shpejt, mund ta kishim shfrytëzuar, edhe për t’i rikthyer jetën njerëzve në Shqipëri”, deklaroi Duka nga Andorra.