Enigma Dybala, dëmtimi në gju kthehet në mister te Juventusi

Juventus-Crotone u mendua se do të ishte ndeshja perfekte për rikthimin e Paulo Dybalas në fushë pas një kohe të gjatë. Gjithsesi një gjë e tillë nuk ndodhi, pasi argjentinasi nuk ishte ende i gatshëm. Tifozët bardhezi duhet të presin akoma për të shijuar në fushë “magjitë” e La Joya-s që duhet theksuar se në këtë sezon ka lënë shumë pak shenjë, teksa në 11 takime që është aktivizuar në Serie A ka shënuar vetëm 2 gola.

Pirlo vendosi të mos e rrezikonte Dybalan ndaj Crotones, pasi gjuri i argjentinasit ka ende probleme dhe do t’i duhet edhe pak kohë për t’u rikuperuar plotësisht. 12 muajt e fundit nuk kanë qenë më të mirët në karrierën e Dybalas sepse nga ai gol ndaj Interit në derbin e Italisë 8 marsin e kaluar e deri më sot, 27-vjeçari ka vuajtur shumë duke u dëmtuar në disa raste dhe duke kaluar një pjesë të madhe të kohës në infermieri.

Problemet fizike janë kthyer në një makth për numrin 10 të bardhezinjëve dhe për të parë sërish Dybala-n e vërtetë, atë që zgjidh ndeshjet me një goditje prej gjeniu, Andrea Pirlo dhe tifozët e Juves duhet të presin ende. Rikthimi në fushë i argjentinasit mbetet një mister edhe pse në kampin e kampionëve të Italisë shpresojnë që 27-vjeçari të jetë sa më shpejtë në dispozicion të skuadrës.