Këngëtari Labinot Rexha ka reaguar lidhur me përplasjen e bujshme mes Edi Kuçit dhe Joz Markut, duke dënuar publikisht dhunën dhe sjelljet agresive. Në një lidhje direkte me emisionin “Shqipëria Live”, Rexha u shpreh se ajo që ka parë në televizion e ka shqetësuar dhe kritikoi tendencën e disa personazheve për të krijuar konflikte me qëllim tërheqjen e vëmendjes.
Rexha theksoi gjithashtu se një sjellje e tillë mund të ndikojë edhe në karrierën e artistëve, pasi sipas tij publiku mund të ndihet i pasigurt t’i angazhojë në evente private. “Duke u bërë kështu gangster, unë mendoj se kështu e humb punën. Njerëzit kanë frikë të të marrin në dasma”, u shpreh ai. Këngëtari bëri thirrje edhe për më shumë vëmendje nga autoritetet ndaj konflikteve që zhvillohen në transmetime live në rrjetet sociale, veçanërisht në TikTok.
“Të isha në vend të policisë, i kisha marrë në pyetje TikTok-erët që ofendojnë live. Kam marrë mbi 200 mesazhe, njerëz që kanë frikë të ndalojnë nga policia”, tha Rexha. Pavarësisht kritikave për sjelljen agresive të Edi Kuçit, Rexha foli me tone pozitive për të, duke e cilësuar si një person me zemër të mirë. “Edi është pak agresiv, por ka një zemër shumë të madhe. Të rrish dy minuta me të, ai të jep çdo gjë. Është një djalë shembullor”, përfundoi Labinot Rexha.
