Elseid Hysaj mund të vijojë karrierën sërish në kampionatin italian. Mbrojtësi i Kombëtares shqiptare ka përfunduar aventurën me Lazion dhe aktualisht është në kërkim të një klubi të ri, ndërsa interesimi për të nuk mungon.
Sipas raportimeve nga Italia, në garë për shërbimet e shkodranit është futur edhe Fiorentina. Klubi nga Firence po monitoron tregun për një mbrojtës të djathtë dhe Hysaj është një prej emrave që po shqyrtohen.
Megjithatë, Fiorentina po ndjek paralelisht edhe situatën e Matteo Darmian. Ky i fundit raportohet se është pranë një transferimi te Bologna, por ende përmendet edhe si një alternativë për klubin vjollcë.
Darmian ka ndikuar gjithashtu në situatën e Hysajt. Pak ditë më parë, shqiptari u përfol si një mundësi për Bologna-n, por më pas emri i mbrojtësit italian mori avantazh në planet e klubit.
Tashmë, Hysaj mund të ketë një tjetër mundësi për të qëndruar në Serie A, me Fiorentinën që po shqyrton profilin e tij. Mbrojtësi 31-vjeçar synon të vijojë karrierën në elitën e futbollit italian, ku ka kaluar pjesën më të madhe të karrierës së tij.
Në javët e fundit, emri i Hysajt është lidhur edhe me Lecce-n dhe Ascoli-n. Ndërkohë, është përfolur edhe mundësia e një rikthimi në futbollin shqiptar, por vetë shkodrani e ka mohuar këtë skenar.