Gazetari portugez Rui Santos është i bindur se Cristiano Ronaldo nuk do të rikthehet te kombëtarja e Portugalisë për sa kohë që Jorge Jesus do të jetë në drejtimin e saj. Përplasja mes dy figurave ka shkaktuar një situatë të tensionuar brenda kampit të luzitanëve dhe, sipas Santos, marrëdhënia mes tyre është shumë larg normalizimit.
Shkak për përplasjen u bë vendimi i Jorge Jesus për të mos e aktivizuar Ronaldon në ndeshjen ndaj Norvegjisë. Trajneri mbrojti publikisht zgjedhjen e tij edhe pas përfundimit të takimit, duke theksuar se në kombëtare të gjithë futbollistët duhet të trajtohen njësoj dhe se askush nuk mund të ketë privilegje të veçanta.
Rezultatet e kanë forcuar pozitat e teknikut portugez. Që prej marrjes së drejtimit të kombëtares, Jesus ka regjistruar katër fitore në katër ndeshje, duke fituar një kredi të rëndësishme për të mbrojtur vendimet e tij edhe përballë një figure si Cristiano Ronaldo.
Ditët e fundit, disa raportime kishin lënë të kuptohej se situata mund të ishte qetësuar. Vetë Jorge Jesus e kishte cilësuar përplasjen si një çështje të kaluar dhe kishte lënë të hapur mundësinë e rikthimit të Ronaldos në grumbullimin e ardhshëm.
Megjithatë, Rui Santos sjell një version krejt tjetër. Sipas gazetarit portugez, Ronaldo është ende i zemëruar me deklaratat e fundit publike të trajnerit, çka tregon se tensioni mes të dyve vazhdon të jetë i madh.