Gjimshiti: I futëm frikën Anglisë, bari i fushës ishte i lartë!

Berat Gjimshiti deri në minutën e 38-të ishte futbollisti më i mirë në fushën e lojës, derisa më pas erdhi një gol me kokë nga Harry Kane, por jo për faj të tij. Qendërmbrojtësi që po kalon një formë fantastike ka dhënë komentin e tij pas duelit, duke kritikuar fushën që sipas tij ishte pak më e lart se sa duhet.

“Vështirë sigurisht që po, i gjithë ekipi i Anglisë luan në ekipe të njohura dhe nivel të lartë. I përballuam mirë, goli i parë ishte merita e sulmuesit, te goli i dytë mora rrezik për të dhënë atë pasim në mes. Kane është një sulmues me cilësi, e ka treguar vetën. Nuk është hera e parë që përballem me sulmues të këtij niveli, por çdo gabim e paguan në këto nivele.

Nuk ishte fusha aq e mirë, bari i lartë për të luajtur me topin në këmbë, duhej luajtur me top të gjatë. Në ndeshje të këtij niveli duhet vetbesim. Çfarë nuk funksionoi? Besoj që e kishim përgatitur shumë mirë ndeshjen. Kishim një rast në kundërsulm, mund të ndryshonte loja. I futëm frikën Anglisë. Në këto ndeshje të këtij niveli duhet më shumë vetëbesim, si dhe të krijosh më shumë raste“, deklaroi Gjimshiti.