Iniesta vlerëson Yamal: Nuk është normale ajo që po bën në këtë moshë!

Legjenda e Barcelonës, Andrés Iniesta, ka folur me superlativa për talentin e Lamine Yamal, duke e cilësuar zhvillimin e jashtëzakonshëm të sulmuesit spanjoll si diçka krejtësisht të pazakontë për një futbollist të moshës së tij.

Në një intervistë për Mundo Deportivo, ish-mesfushori i Barcelonës theksoi se arritjet e Yamalit në një moshë kaq të re nuk mund të konsiderohen normale, pasi nëse do të ishin të tilla, shumë më tepër lojtarë do të kishin arritur të njëjtin nivel.

“Jo, nuk është normale. Nëse do të ishte, do të kishte shumë lojtarë të tjerë që do të mund ta bënin. Nuk është normale dhe ajo që është e bukur dhe e rëndësishme në gjithë këtë është ambicia e tij dhe talenti natyral. Kur ndalesh dhe mendon se çfarë ka përpara në një moshë të tillë, është e mrekullueshme”, u shpreh Iniesta.

Yamal, pavarësisht moshës së re, ka fituar trofe të rëndësishëm dhe është kthyer në një prej figurave kryesore të Barcelonës dhe kombëtares spanjolle. Për Iniestën, megjithatë, sfida më e madhe për talentin e ri nuk është ajo që ka arritur deri tani, por aftësia për të ruajtur të njëjtin nivel në vitet që vijnë.

Sipas legjendës së Barcelonës, suksesi i vërtetë kërkon vazhdimësi dhe jo vetëm një seri sezonesh të suksesshme.

“Sfida e vërtetë për futbollistët dhe për skuadra si Barça është të përsëritesh vit pas viti. Nuk ka rëndësi vetëm ajo që ke fituar, por ajo që duhet të vazhdosh të fitosh çdo sezon. Kjo është çelësi”, deklaroi Iniesta.

Ish-mesfushori shtoi se Yamal dhe bashkëlojtarët e tij, të cilët kanë fituar trofe të rëndësishëm në një moshë shumë të re, tashmë përballen me përgjegjësinë për të ruajtur standardet e larta dhe për të vazhduar të luftojnë për trofe sezon pas sezoni.