Interi nis ofertën e parë për Vidal, por duhen edhe 8 mln euro

Interi dhe Antonio Conte nuk kanë ndërmend që të heqin dorë nga Arturo Vidal. Kiliani shihet si lojtari i duhur nga trajneri i zikaltërve për të përforcuar mesfushën në merkaton e janarit dhe për të vijuar luftën për titullin kampion me Juventusin.

Barcelona nuk do të dorëzohet lehtë për një futbollist që pavarësisht moshës, ruan ekuilibrat e lojës sa herë Valverde ka nevojë për të. Conte e do futbollistin që në fillim të janarit por diferenca mes ofertës dhe kërkesës është plot 8 milionë euro.

Drejtuesit e Interit janë gati të shpenzojnë 12 milionë, por “blaugranat” nuk duan ta lëshojnë pa 20 milionë euro. Menaxher i Arturo Vidalit, Felicevich, i njëjti që ka bërë të mundur transferimin e Alexis Sanchez në Milano, po punon për t’i afruar palët.