Kane: I lumtur te Bayerni, synimi është ta mbyllim me trofe edhe në Champions

Pas një dekade te Tottenham Hotspur, ku u kthye në simbol të klubit por pa arritur të fitojë një trofe, Harry Kane duket se ka gjetur më në fund shpërblimin e shumëpritur në Gjermani.

Transferimi te Bayern Munich ka ndryshuar rrënjësisht rrjedhën e karrierës së sulmuesit anglez. Fundjavën e kaluar, ai shtoi një tjetër titull të Bundesliga në koleksionin e tij, duke e shoqëruar me suksesin e sezonit të kaluar dhe Superkupë.

Në ndeshjen e fundit të kampionatit kundër Stuttgart, Kane vulosi një tjetër paraqitje të jashtëzakonshme duke realizuar golin e 51-të sezonal,një shifër që flet qartë për formën e tij të shkëlqyer në moshën 32-vjeçare.

Në drejtimin e klubit bavarez, zërat për të ardhmen e tij janë të qartë. Presidenti i nderit, Uli Hoeneß, theksoi: “Me klauzolën e lirimit që skadon në verën e vitit 2026 dhe kontratën deri në 2027, nuk jemi nën presion për momentin”.

Vetë Kane, në një prononcim për Sky Sports Gjermani, u shpreh i kënaqur me aventurën e tij: “Jam vërtet i lumtur këtu. Me ekipin, trajnerin dhe stafin, të gjithë po ecim në të njëjtin drejtim. Kemi ende shumë për të arritur këtë sezon dhe kjo e bën gjithçka emocionuese”.

Duke reflektuar mbi suksesin, sulmuesi anglez nënvizoi sakrificën pas triumfeve: “Fitimi i titujve nuk është kurrë i lehtë. Shumë mendojnë se duhet të fitojmë çdo vit, por pas kësaj fshihet një punë dhe përkushtim i madh. Tani synimi është ta mbyllim sezonin në mënyrën më të mirë, në kampionat, kupë dhe natyrisht në Champions League”.