Kryeministri britanik ultimatum Abramovich-it: Paguaj tani ose do të shkojmë në gjykatë

Kryeministri britanik, Sir Keir Starmer, i ka dërguar një ultimatum të drejtpërdrejtë Roman Abramovich-it, ish-presidentit të Chelsea-t, duke kërkuar që ai të respektojë angazhimin e marrë për fondet e përfituara nga shitja e klubit londinez.

“Mesazhi im për Abramovich-in është i qartë: koha po mbaron. Ndero angazhimin që ke marrë dhe paguaj menjëherë. Nëse nuk e bën, jemi gati të shkojmë në gjykatë që çdo qindarkë e vetme të arrijë tek ata, jetët e të cilëve janë shkatërruar nga lufta e paligjshme e Putinit”, deklaroi Starmer.

Referenca e kryeministrit britanik lidhet me majin e vitit 2022, kur oligarku rus u detyrua të shiste Chelsea-n pas pushtimit të Ukrainës nga Rusia. Në atë kohë, Abramovich ishte zotuar se të ardhurat nga shitja e klubit, rreth 2.5 miliardë paund, do t’i dhuroheshin popullit ukrainas.

Megjithatë, këto fonde vijojnë të jenë të ngrira në një bankë në Mbretërinë e Bashkuar. Të mërkurën, autoritetet britanike dhanë një licencë të jashtëzakonshme që lejon transferimin e shumës së madhe. Tani vendimi i takon sërish Abramovich-it, i cili duhet të paraqesë një propozim për transferimin vullnetar të parave drejt Ukrainës.