Ajo që për muaj të tërë është dukur si një operacion pothuajse i pamundur, në ditët e fundit të merkatos mund të bëhet papritur shumë më konkrete. Roma nuk ka hequr dorë nga ideja për të transferuar Rafael Leao, duke e konsideruar portugezin si një profil që mund t’i japë skuadrës së Gian Piero Gasperinit shpejtësinë dhe forcën në krah që i ka munguar.
Transferimi do të mund të zgjidhte njëkohësisht edhe një problem për Milanin, i cili do të çlirohej nga një lojtar që duket gjithnjë e më larg projektit teknik të klubit. Megjithatë, marrëveshja mbetet e komplikuar dhe disa kushte duhet të plotësohen që operacioni të bëhet realitet.
Një nga faktorët kryesorë është mungesa e ofertave konkrete për Leao nga klubet e tjera. Interesimi nga Arabia Saudite dhe Turqia, pavarësisht mundësisë për t’i ofruar sulmuesit një pagë shumë të lartë, nuk e ka bindur portugezin.
Leao ka preferuar gjithmonë një transferim në Premier League, të cilën e konsideron si hapin e radhës në karrierën e tij. Por deri më tani nga Anglia nuk ka ardhur asnjë ofertë konkrete.
Kjo situatë mund t’i japë Romës një mundësi për t’u futur në garë në orët e fundit të merkatos. Klubi verdhekuq po e monitoron situatën dhe është gati të lëvizë nëse kushtet bëhen më të favorshme.
Pika më e vështirë mbetet formula e transferimit. Milani deri tani ka qenë i qartë: Leao mund të largohet vetëm në mënyrë përfundimtare dhe për një shumë prej të paktën 50 milionë eurosh.
Roma, nga ana tjetër, shpreson që në ditët e fundit të merkatos kërkesat e kuqezinjve të zbuten. Ideja e klubit kryeqytetas është një huazim me pagesë prej 4 milionë eurosh, me detyrim blerjeje të kushtëzuar prej 41 milionë eurosh. Në total, operacioni do të arrinte rreth 45 milionë euro, pra pak më poshtë se kërkesa fillestare e Milanit.
Edhe paga e lojtarit do të ishte një tjetër element për t’u zgjidhur. Roma do të ishte e gatshme të marrë përsipër rreth 80% të pagës së Leao-s, duke përfituar nga regjimi fiskal që ende aplikohet për futbollistin portugez dhe duke respektuar kufirin e përcaktuar nga klubi për kostot e pagave.