Lucumí prezantohet te Juventusi: Kam ardhur te skuadra më e madhe e Italisë!

Jhon Lucumí është zyrtarisht futbollist i Juventusit dhe ka firmosur kontratën që do ta mbajë në Torino deri në vitin 2030. Mbrojtësi kolumbian ka shprehur emocionet e tij të para pas transferimit te bardhezinjtë, duke theksuar ambicien për t’u përshtatur sa më shpejt me skuadrën.

“Po vij te skuadra më e madhe e Italisë dhe jam vërtet i emocionuar. Mezi pres të përshtatem sa më shpejt me shokët e rinj dhe të jap kontributin tim gjatë këtij sezoni”, u shpreh Lucumí në intervistën për faqen zyrtare të Juventusit.

Mbrojtësi foli edhe për modelet e tij të frymëzimit, duke përmendur një tjetër kolumbian që ka shkruar historinë me fanellën bardhezi.

“Mendoj se i pari është Cuadrado. Ai ka bërë një punë të madhe këtu dhe është një pikë referimi në Kolumbi, sepse ka luajtur për këtë skuadër”, deklaroi Lucumí.

Por mbrojtësi nuk u ndal vetëm te Cuadrado. Ai përmendi edhe disa prej legjendave të repartit defensiv të Juventusit.

“Juventusi ka pasur mbrojtës të mëdhenj si Chiellini, Bonucci dhe Barzagli. Mendoj se ata janë modele për mua dhe për të gjithë lojtarët që luajnë në këtë pozicion”, shtoi kolumbiani.

Lucumí foli gjithashtu për kontaktin e parë me trajnerin Luciano Spalletti: “Me Spallettin vetëm jam përshëndetur. E di se mund të jap një ndihmë të rëndësishme dhe të jap shumë për Juventusin”.

Me kontratë deri në vitin 2030, mbrojtësi kolumbian pritet të jetë një nga përforcimet e rëndësishme të Juventusit në repartin defensiv.