Mbrojtësi masakron me grushte sulmuesin në SHBA gjatë një ndeshje të shkollave të mesme (VIDEO)

Një ndeshje futbolli mes dy shkollave të mesme në SHBA u shndërrua në një skenë dhune, pasi një përplasje në fushë përfundoi me goditje dhe grushta ndaj njërit prej lojtarëve.

Ngjarja ndodhi gjatë përballjes mes Brookings High School Bobcats dhe Rapid City Central Cobblers, në Dakota e Jugut. Pamjet e incidentit janë bërë virale në rrjetet sociale dhe kanë shkaktuar reagime të shumta.

Në momentin e përplasjes, Bobcats kryesonin 2-0, ndërsa kishin mbetur më pak se katër minuta nga përfundimi i pjesës së parë.

Gjithçka nisi pas një topi të luajtur në krahun e majtë. Një sulmues i Brookings dhe një mbrojtës i Rapid City Central u përplasën fizikisht në duelin për topin. Sulmuesi fitoi dyluftimin dhe tentoi të largohej me topin, ndërsa mbrojtësi humbi ekuilibrin pas kontaktit.

Por situata mori një kthesë të papritur. Mbrojtësi i Cobblers u ngrit dhe iu vërsul kundërshtarit, duke e shtyrë fort dhe duke e rrëzuar në tokë.

Më pas, ai e ndoqi lojtarin teksa ishte ende i shtrirë dhe, sipas pamjeve, e goditi me këmbë, përpara se të përkulej mbi të dhe ta godiste disa herë me grushte në pjesën e pasme të kokës. Lojtari i rrëzuar u përpoq të mbronte kokën me duar.

Në fushë ndërhynë menjëherë trajnerët, zyrtarët dhe lojtarë të tjerë për të ndalur përleshjen. Edhe portieri i Cobblers iu afrua shokut të skuadrës për ta qetësuar.