Ministri i sportit i Iranit: Mund të merret vendimi për të mos shkuar në Botëror

Negociatat e mundshme mes Shtetet e Bashkuara të Amerikës dhe Iran mund të ndikojnë drejtpërdrejt edhe në futbollin ndërkombëtar, teksa po afrohet Kupa e Botës 2026 që do të zhvillohet në SHBA, Meksikë dhe Kanada.

Sipas raportimeve të BBC, ministri iranian i sportit, Ahmad Donyamali, ka deklaruar se ende nuk ka një vendim përfundimtar mbi pjesëmarrjen e përfaqësueses iraniane. Ai theksoi se vetëm qeveria ose Këshilli Suprem i Sigurisë Kombëtare mund të japin dritën jeshile.

“Ekziston mundësia që të merret vendimi për të mos shkuar. Kemi planifikuar një grumbullim në javën e tretë të majit në një vend fqinj për rreth një javë. Nëse garantohet siguria për lojtarët dhe vendi pritës shmang sjelljet e papërshtatshme, atëherë do të merret një vendim i duhur”, u shpreh Donyamali.

Në krahun tjetër, presidenti i FIFA, Gianni Infantino, është shprehur i bindur për pjesëmarrjen e Iranit: “Irani do të jetë patjetër në Botëror, janë kualifikuar dhe lojtarët duan të luajnë”.

Megjithatë, situata komplikohet nga qëndrimi politik në SHBA. Presidenti amerikan Donald Trump ka deklaruar se “prania e tyre në territorin amerikan nuk është e përshtatshme”, duke shtuar pasigurinë rreth këtij rasti.