Plas te Portugalia, Cristiano Ronaldo nuk stërvitet me ekipin dhe bëhet cështje

Një situatë e pazakontë ka përfshirë Kombëtaren e Portugalisë në prag të ndeshjes ndaj Danimarkës. Cristiano Ronaldo nuk mori pjesë në stërvitjen e fundit të skuadrës, duke shtuar pikëpyetjet rreth gjendjes së kapitenit portugez.

Pas 90 minutave në stol në fitoren ndaj Norvegjisë, Ronaldo u paraqit në stadiumin Eleda të Malmos rreth 30 minuta para nisjes së seancës stërvitore. Megjithatë, ndryshe nga pjesa tjetër e skuadrës, ai nuk zbriti në fushë për t’u stërvitur me grupin.

Ronaldo u largua nga stadiumi në momentin që pjesa tjetër e ekipit po zhvillonte përgatitjet. Bashkë me të, jashtë stërvitjes mbetën edhe João Félix dhe Francisco Conceição, të dy të dëmtuar.

Sipas Federatës Portugeze të Futbollit, mungesa e Ronaldos në stërvitjen me grupin nuk lidhet me një problem të raportuar fizik. Federata ka shpjeguar se stadiumi nuk kishte pajisjet e nevojshme për të realizuar programin individual të parashikuar për sulmuesin.

Për këtë arsye, Ronaldo u rikthye në hotelin ku qëndron delegacioni portugez, ku zhvilloi një program specifik në palestër. Megjithatë, FPF nuk ka dhënë detaje të mëtejshme rreth natyrës së këtij programi.

Situata ka tërhequr vëmendjen edhe për faktin se Ronaldo kishte nisur nga stoli në ndeshjen ndaj Norvegjisë. Kapiteni portugez nuk e fshehu zhgënjimin pas përfundimit të takimit, duke u larguar nga fusha pa përshëndetur tifozët.

Presidenti i Federatës shkon në Kopenhagë

Në përpjekje për të qartësuar situatën, presidenti i Federatës Portugeze të Futbollit, Pedro Proença, është nisur me urgjencë drejt Kopenhagës, aty ku Portugalia do të përballet me Danimarkën.

Federata portugeze nuk dëshiron që situata të kthehet në një çështje të madhe, por mungesa e Ronaldos në stërvitje, pas uljes në stol ndaj Norvegjisë, ka shtuar vëmendjen rreth yllit të skuadrës.

Tashmë mbetet për t’u parë nëse Cristiano Ronaldo do të jetë në dispozicion të trajnerit Jorge Jesus për sfidën e radhës ndaj Danimarkës.