Ka qenë një periudhë kur Paris Saint-Germain investonte fuqishëm për të fituar UEFA Champions League, duke afruar emrat më të mëdhenj të futbollit botëror, por pa arritur kurrë objektivin final. Kulmi i këtij dështimi erdhi kur në të njëjtin ekip u bashkuan Lionel Messi, Neymar dhe Kylian Mbappé, një treshe që në letër dukej e pandalshme.
Ish-trajneri i asaj kohe, Mauricio Pochettino, aktualisht në krye të përfaqësueses së SHBA-ve, ka zbuluar së fundmi prapaskenat e mungesës së harmonisë mes yjeve, veçanërisht mes Messit dhe Mbappé.
Në një intervistë për kanalin YouTube “We Are The Overlap”, tekniku argjentinas shpjegoi se problemet nisnin nga filozofitë e ndryshme të lojës. Sipas tij, “Messi preferonte ndërtimin e aksioneve nga prapavija, me ritëm të ngadaltë dhe kombinime të shpeshta, duke shfrytëzuar aftësinë e tij për të kontrolluar topin dhe për të kaluar disa kundërshtarë radhazi”.
Në krahun tjetër, Mbappé kishte një qasje krejt tjetër: sulmin e shpejtë në hapësirë. “Kur rikuperonim topin, ai kërkonte menjëherë thellësinë. Ideja ishte t’i jepje topin dhe ta lije të vraponte”, shpjegoi Pochettino.
Kjo diferencë stilistike krijonte një konflikt të vazhdueshëm në fushë. “Kur luanim për Messin, Mbappé thoshte se pika e tij e fortë është vrapimi. Ndërsa nëse luanim për Mbappé, nuk mund të shfrytëzonim plotësisht Messin”, theksoi ai, duke nënvizuar pamundësinë për të balancuar dy mënyra loje kaq të ndryshme.
Pochettino ndaloi edhe te fillimi i vështirë i Messit në Francë, pas transferimit nga Barcelona në vitin 2021. “Ai erdhi pa fazë përgatitore dhe pas një goditjeje të fortë emocionale. Për më tepër, atmosfera ndaj tij ishte shpesh armiqësore”, u shpreh trajneri.