Gjysmëfinalja e kthimit në Champions League mes Bayern dhe PSG ka nisur shumë përpara fishkëllimës së parë. Sfida e programuar më 6 maj në Allianz Arena pritet të jetë spektakolare, pas fitores dramatike 5-4 në ndeshjen e parë, që e lë të hapur kualifikimin.
Por tensioni nuk kufizohet vetëm në fushë. PSG kishte planifikuar të qëndronte në Infinity Hotel në Mynih, i njëjti hotel ku ishte akomoduar një vit më parë, kur fitoi bindshëm finalen e Champions League ndaj Interit me rezultatin 5-0. Një zgjedhje e lidhur edhe me supersticionin, duke qenë se ajo strukturë konsiderohej “fatlume” për parizienët.
Megjithatë, plani i klubit francez hasi në kundërshtimin e fortë të vendasve. Infinity Hotel është tradicionalisht baza e Bayern para ndeshjeve në shtëpi, për shkak të afërsisë me stadiumin. Trajneri Vincent Kompany dhe drejtuesit bavarezë refuzuan kategorikisht ta lironin.
“Është qyteti ynë. Ne qëndrojmë këtu. Nuk e lëshojmë hotelin tonë,” ishte mesazhi i prerë nga kampi gjerman, duke e kthyer çështjen në një betejë të vërtetë psikologjike para sfidës vendimtare.
Si pasojë, Paris Saint-Germain u detyrua të ndryshojë planet në momentet e fundit dhe do të akomodohet në Andaz Hotel, një alternativë e përshtatshme logjistikisht, por pa të njëjtin “efekt fatlum”.
Në kampin francez, kujtimet nga qëndrimi i mëparshëm në Infinity Hotel janë ende të freskëta, pasi aty hodhën themelet e një prej netëve më të mëdha në historinë e klubit. Trajneri Luis Enrique dhe skuadra kishin mbetur të kënaqur me kushtet dhe ambientin.