Sarri kërkon të “pushtojë” Lazion me shqiptarë, synon 3 futbollistë!

Emrat e parë në merkato për skuadrën e Lazios në rast se do të afrohet Maurizio Sarri në krye të skuadrës, kanë dalë tashmë. I pari në listën e strategut italian është Elseid Hysaj, i cili mbetet pa kontratë te Napoli në fundin e këtij muaji. Eksperienca e shkodranit është e madhe, pasi te Empoli dhe Napoli ka luajtur në 243 ndeshje, ndërkohë që në total ka 332 ndeshje si profesionist.

Duke qenë se është një transferim i lirë, ai ka përfunduar edhe në listën e dëshirave të Fiorentinës. Lazio pritet të transferojë në mbrojtje edhe Kamenovic, ndërkohë që mund të rikthehet edhe Lukaku. Hysaj ndërkohë shihet si një okazion, duke marrë në konsideratë faktin që është një nga lojtarët e preferuar të Sarrit. Në mbrojtje edhe Nikola Maksimovic dhe Jerome Boateng janë dy mundësi shumë të mira. Në mesfushë Milinkovic dhe Luis Alberto, ndërkohë që e ardhmja e Correa-s është në dyshime.

Me afrimin e Sarrit, numri i shqiptarëve mund të bëhet edhe më i madh. I pari është Milot Rashica, të cilit i përfundon kontrata në vitin 2022 me Werder Bremen, të cilët kanë rënë nga kategoria. Xherdan Shaqiri ndërkohë do të largohet nga Liverpooli, teksa kontrata i përfundon në vitin 2023, pasi nuk ka më hapësira në Angli. Në sulm, Lazio mund të besojë te talenti i moshave, Raul Moro, ndërkohë që Immobile mund të mbetet një pikë referimi. Lazio me Sarrin pritet të lindë shumë shpejt, teksa firma pritet të vijë shumë shpejtë. /R.Lika-Koha Jone/