Sezon i artë për ekipet shqiptare, kualifikohen edhe Kukësi me Laçin në Europa League (VIDEO)

Kukësi dhe Laçi janë dy skuadrat e tjera shqiptare që i bashkohen Tiranës dhe Teutës në turin e dytë në Europa League.  Edhe pse në letër dukej një ndeshje e vështirë, nënkampionët e Shqipërisë treguan grintë dhe dëshirë për t’u konfirmuar më tej në futbollin europian.

Skuadra verilindore mundi 2-1 Slavia Sofian. Ndeshja nisi e barabartë me të dyja ekipet që në pjesën e parë më shumë studionin njëra tjetrën sesa sulmonin. Goli i parë për Kukësin erdhi në minutën e 57-të me anë të një penalltie që u dërgua në rrjetë nga Eze. Bullgarët do të barazonin 10 minuta nga fundi me Krasteve, por skuadra e Gegës do të shënone me Cooper duke marrë një fitore të rëndësishme.

Laçi u kualifikua në raundin tjetër të Europa League pas ruletës së 11-metërshave. Ndeshja ndaj Keshlas së Azerbajxhanit përfundoi 0-0, ndërsa Laçi kaloi më tej pasi u tregua i saktë në të pesta penalltitë, ndërsa vendasit gabuan 11-metërshin e fundit, që u ndal nga Sherri. Për t’u evidentuar edhe fakti se kurbinasit luajtën për 40 minuta me një futbollistë më pak.