Shehi: Të sillemi si kampionët në fuqi, Muçi do na mungojë!

Fundjava në futbollin shqiptar sjell klasiken mes Tiranës dhe Vllaznisë. Trajneri i bardhebluve, Orges Shehi nënvizoi skuadra duhet të hyjë në fushë në këtë ndeshje me stofin e kampionëve në fuqi. Shehi bëri një koment edhe për kalimin e Ernest Muçit te Legia e Varshavës.

“Kemi vështirësi edhe për shkak të situatës në të cilën ndodhet e gjithë bota, jo vetëm ne, por edhe për kartonët. Me lojtarët që janë të gatshëm, besoj se mund ta përballojmë këtë ndeshje që kemi. Është ndeshje shumë e rëndësishme, edhe nga kundërshtarët kemi përpara, por edhe nga situata që jemi, pasi kemi nevojë për pikë. Është ndeshje përballë një kundërshtari që ka bërë shumë mirë këtë vit. Duhet të sillemi si kampionët në fuqi, duhet të hyjmë me këtë mentalitet përballë një kundërshtari që po bën mirë. Është klasikja e futbollit shqiptar, kështu që motivimi nuk mungon tek asnjë”.

Janë edhe shumë javë në lojë, Nuk mund të heqim dorë nga objektivat tona. Ne luajmë për t’u rikthyer aty ku duhet. Ndeshja e fundit me Teutën na ka lënë një shije jo të mirë dhe duhet të rikthejmë imazhin personal dhe të ekipit. Na mungojnë dy shtyllat e mbrojtjes Najdovski-Hoxhallari, por do të përshtatemi me këto vështirësi. Shpresoj t’ia dalim.

Muçi? Është një lojtar me shumë cilësi, nga më të mirët dhe talent i futbollit shqiptar. Në futbollin modern, dinamika është shumë e ndryshme. Kjo lëvizja e Muçit, është lëvizje e futbollit modern. Sigurisht që do të na mungojë, sepse dihen cilësitë e tij, por duhet të shikojmë përpara me situatën ku jemi dhe lojtarët që kemi”, deklaroi Shehi