Trajneri i Juventus, Luciano Spalletti, ka reaguar me zhgënjim pas barazimit 1-1 ndaj Hellas Verona, duke theksuar se skuadra e tij humbi një mundësi të artë për të marrë tri pikë të rëndësishme.
“Nuk e fituam këtë ndeshje, ka keqardhje dhe zhgënjim. Me pak më shumë qartësi mund ta kishim kontrolluar lojën. Qartësia bën diferencën te një lojtar i madh”, u shpreh Spalletti pas ndeshjes.
Ai analizoi edhe rrjedhën e takimit, duke nënvizuar se skuadra e nisi mirë, por hasi vështirësi për të çarë mbrojtjen kundërshtare.
“E nisëm mirë ndeshjen, ata u mbrojtën thellë. Nuk arritëm ta menaxhonim si duhet dhe u dhamë mundësi kundërsulmeve. Pastaj pësuam një gol me lehtësi dhe gjithçka u bë më e vështirë”, tha ai.
Sa i përket repartit mbrojtës, Spalletti vlerësoi lojtarët e tij: “Gleison Bremer dhe Lloyd Kelly janë shumë të fortë në duele, por në ndërtimin e lojës mund të japin diçka më shumë”.
Për fazën sulmuese, ai shtoi: “Na mungon cilësia në hapësirat e ngushta. Dušan Vlahović duhet të qëndronte më shumë në zonë. Kenan Yıldız nuk ishte në formën më të mirë”.
Në fund, Spalletti komentoi edhe menaxhimin e lojës nga kundërshtari: “Ata përdorën çdo moment për të fituar kohë, por në fund morën një pikë të merituar. Megjithatë, kjo ishte një ndeshje që duhej fituar patjetër”.