Suarez thërret Lautaron te Barcelona: Do ta ndihmojmë të ambientohet!

Jo vetëm Lionel Messi, tani edhe një tjetër futbollist i madh i Barcelonës thërret Lautaro Martinez që të transferohet në Katalonjë. “Është një futbollist i madh”,- ka thënë Suarez në një intervistë për gazetën “Sport”.

“Është një periudhë ku po luan në nivele të larta tek Interi. Nuk është e thjeshtë që të shkosh në Itali nga Argjentina dhe të bësh atë që po bën ai. Në Itali nuk luhet një futboll aspak i thjeshtë. Është i ri, nëse vjen te Barcelona do ta ndihmojmë që të ambientohet”, deklaroi Suarez.

Edhe pse shihet si pasuesi i uruguaianit te skuadra e Barcelona, Suarez nuk ndjen aspak konkurrencë teksa është gati që të hap krahun për një sulmues që ka të ardhme të madhe përpara. Lautaro është një nga objektivat kryesor në merkato, por deri më tani kanë hasur në rezistencën e drejtuesve të skuadrës së Interit që kërkojnë mbi 100 milionë euro, ndërkohë që blaugranët janë gati që të ofrojnë deri në 90 milionë euro. /R.Lika-Koha Jone/