Tension i lartë te Real Madrid, ku protagonist është Kylian Mbappe. Sulmuesi francez është vënë në qendër të kritikave të ashpra nga tifozët “Los Blancos”, të cilët kanë shpërthyer në rrjetet sociale duke kërkuar largimin e tij nga klubi.
Gjithçka nisi pas një postimi të Real Madrid mbi stërvitjen e fundit të skuadrës, i cili u “pushtua” nga komente të përsëritura me mesazhin “Fuera Mbappé”. Shkak për reagimin e ashpër të tifozëve është bërë udhëtimi i fundit i lojtarit në Itali, konkretisht në Sardenjë, në shoqërinë e aktores Ester Expósito. Ky veprim është interpretuar si mungesë përkushtimi në një moment delikat të sezonit.
Situata rëndohet edhe më shumë nga raportimet e L’Équipe, sipas të cilave Mbappé ka dashur të distancohet përkohësisht nga skuadra dhe stafi teknik, duke shfrytëzuar periudhën e rikuperimit nga dëmtimi i pësuar në barazimin 1-1 ndaj Real Betis. Po ashtu, flitet për marrëdhënie jo të mira me disa nga shokët e ekipit.
Megjithatë, sulmuesi është rikthyer në Madrid dhe ka rifilluar punën rehabilituese në qendrën stërvitore Valdebebas, me synimin për të qenë gati për përballjen vendimtare ndaj Barcelonës në “El Clasico”, një sfidë që mund të përcaktojë sezonin.
Aktivbizimi i tij në këtë ndeshje mbetet ende në dyshim, pasi gjithçka do të varet nga rezultatet e vizitave mjekësore në ditët në vijim. Në të njëjtën kohë, Mbappé duket se po përpiqet të rifitojë besimin e tifozëve madrilenë përmes angazhimit maksimal në rikuperim.