Tottenham arrin marrëveshjen për Savinhon për shifrën e 75 milionë paundëve

Tottenham ka arritur një marrëveshje me Manchester Cityn për transferimin e Savinhos, në një operacion që mund të kapë vlerën e 85 milionë paundëve.

Sipas raportimeve të mediave angleze, palët kanë gjetur gjuhën e përbashkët për një shumë prej 75 milionë paundësh si pagesë fillestare, ndërsa 10 milionë të tjera do të jenë në formën e bonuseve.

Savinho, 22 vjeç, pritet të kryejë testet mjekësore përpara se të firmosë kontratën afatgjatë me Tottenhamin. Transferimi përbën një lëvizje të rëndësishme për klubin londinez dhe trajnerin Roberto De Zerbi, i cili e kishte vendosur sulmuesin brazilian në listën e objektivave kryesorë për repartin ofensiv.

Savinho iu bashkua Manchester Cityt në vitin 2024 nga Troyes, pjesë e City Football Group, për rreth 30.8 milionë paund. Nëse marrëveshja me Tottenhamin realizohet sipas kushteve të raportuara, kampionët e Anglisë do ta trefishonin investimin e bërë vetëm dy vite më parë.

Megjithatë, aventura e brazilianit në Premier League nuk ka qenë aq e suksesshme sa pritej. Në 53 paraqitje në kampionat, Savinho ka shënuar vetëm dy gola.