Myrto Uzuni po vazhdon të lërë gjurmë në futbollin amerikan. Sulmuesi i Kombëtares shqiptare, i cili iu bashkua Austin FC në vitin 2025, ka fituar çmimin si golashënuesi më i mirë i Leagues Cup, duke regjistruar një tjetër sukses të rëndësishëm në karrierën e tij.
Futbollisti kuqezi e ka përjetuar me krenari këtë arritje, duke ndarë emocionet e tij përmes një postimi në rrjetet sociale. Uzuni theksoi se ky trofe përfaqëson një moment të veçantë në rrugëtimin e tij sportiv, ndërsa nënvizoi edhe rëndësinë historike të këtij suksesi për klubin amerikan.
“Ka momente që të bëjnë të ndalesh dhe të vlerësosh rrugëtimin që ke bërë. Të mbash këtë trofe në duar është një prej tyre. Jam krenar që bëhem golashënuesi i parë në historinë e Austin FC në ‘Leagues Cup’, duke garuar përkrah emrave më të mëdhenj të futbollit”, shkruan sulmuesi shqiptar.
Uzuni nuk ka harruar të falënderojë as shokët e skuadrës dhe tifozët, të cilët kanë qenë pjesë e këtij suksesi.
“Faleminderit shokëve të mi të skuadrës, që ndihmuan për ta bërë të mundur këtë moment, si dhe tifozëve tanë, të cilët bëjnë që çdo gol të ketë një vlerë edhe më të madhe. Historia u shkrua”, përfundon mesazhi i tij.
Ky vlerësim konfirmon ndikimin e Uzunit te Austin FC dhe përbën një tjetër moment krenarie për sulmuesin e Kombëtares shqiptare, i cili po kërkon të lërë gjurmën e tij në futbollin amerikan.