ZYRTARE/ Arturo Vidal firmos me Interin, ribashkohet me Conten

Arturo Vidal nga dita e sotme është zyrtarisht futbollist i Interit. Futbollisti kilian është transferuar për 1 milion euro nga skuadra e Barcelonës.

“Barça shpreh publikisht mirënjohjen e saj për Vidal, për angazhimin dhe përkushtimin e treguar. I uron atij shumë suksese”, – shkruan klubi blaugrana, duke konfirmuar largimin e lojtarit.

Në dy vitet me katalanasit, mesfushori ka luajtur 96 ndeshje në të gjitha garat, duke shënuar edhe 11 gola. Barcelona i pagoi Bayernit 18 milionë euro, plus 3 milionë në formë bonusesh, verën e vitit 2018.

Arturo Vidal kthehet në Itali dhe do të jetë nën urdhrat e një të njohuri të tij të vjetër: Antonio Conte. Strategu italian e kishte një nga objektivat kryesor që në merkaton e janarit, ndërkohë që në verë hoqi dorë nga Tonali vetëm për të pasur në ekip Vidalin.