Rama: Konsensus për integrimin në BE, Shqipëria drejt hapjes së kapitujve të rinj

Kryeministri Edi Rama ka komentuar miratimin në Kuvend të rezolutës që lidhet me procesin e integrimit të Shqipërisë në Bashkimin Europian, duke e cilësuar si një moment pozitiv bashkimin e votave mes shumicës dhe opozitës për këtë çështje. Në podcastin e tij “Flasim”, kreu i qeverisë u shpreh se ky konsensus politik është një sinjal i rëndësishëm për rrugën europiane të vendit.

Rama tha se bashkimi i forcave politike për çështjen e anëtarësimit në BE është i mirëpritur, edhe pse sipas tij erdhi në mënyrë të papritur. Ai theksoi se çështjet që lidhen me integrimin europian duhet të qëndrojnë mbi debatet politike dhe se do të ishte pozitive që ky bashkëpunim të përsëritej edhe në të ardhmen.

Sipas kryeministrit, opozita duket se ka kuptuar tashmë se procesi i integrimit të Shqipërisë është i pandalshëm dhe se pretendimet për bllokim të negociatave nuk qëndrojnë. Ai nënvizoi se vendi pritet të marrë së shpejti lajme të reja pozitive në raport me negociatat me Bashkimin Europian, duke përfshirë hapjen e kapitujve të tjerë negociues dhe kalimin në faza të reja të procesit.

Rama shtoi se Shqipëria po ecën drejt një momenti të rëndësishëm, ku përveç hapjes së kapitujve, do të nisë gradualisht edhe procesi i mbylljes së disa prej tyre. Kjo, sipas tij, tregon progresin që vendi ka bërë në përmbushjen e reformave dhe standardeve të kërkuara nga BE-ja.

Në përfundim, kreu i qeverisë e krahasoi afrimin e opozitës me shumicën në këtë çështje si një bashkim në “varkën e Shqipërisë europiane”, duke theksuar se dera për bashkëpunim ka qenë gjithmonë e hapur për të gjitha forcat politike kur bëhet fjalë për të ardhmen europiane të vendit.