Benet Beci: Edhe zona e Fermentimit do të jetë pjesë e transformimit të Shkodrës

Një zonë e populluar dhe e ndërtuar gjatë periudhës së stërgjatë të tranzicionit, me probleme gjithnjë e më kritike infrastrukturore, më në fund do të jetë pjesë e ndryshimeve që kanë reflektuar në kthimin e Shkodrës shkodranëve, një projekt jo politik por jetik, i propozuar dhe që po implementohet nga kryebashkiaku Benet Beci.  Në zonën e Fermentimit në Shkodër ka nisur prej ditësh puna për rikonstruksionin e plotë të rrugëve dhe rrugicave, një projekt që synon përmirësimin e infrastrukturës dhe rritjen e cilësisë së jetës për banorët.

Kryetari i Bashkisë Shkodër, Benet Beci, inspektoi sot punimet dhe u shpreh optimist për përfundimin e tyre në afatet e parashikuara. Ai theksoi se ky investim, i realizuar në bashkëpunim me Ministrinë e Ekonomisë, Kulturës dhe Inovacionit, është një hap i rëndësishëm drejt transformimit të kësaj zone.

“Projekti përfshin rikonstruksionin e rrugëve, rrjetin e kanalizimeve dhe ndriçimin, duke krijuar një mjedis modern dhe funksional për mbi 200 shtëpi përfituese. Ky është një shembull i qartë i angazhimit tonë për të sjellë ndryshime të prekshme në komunitete,” tha Beci.

Punimet janë planifikuar të përfundojnë brenda disa muajve, ndërsa banorët shprehen entuziastë për transformimin që po ndodh në lagjen e tyre. Ndërhyrja pritet të ketë një ndikim të rëndësishëm jo vetëm në përmirësimin e kushteve të jetesës, por edhe në rritjen e vlerës së pronave në këtë zonë historike të qytetit.

Autoritetet njoftojnë se gjatë zhvillimit të punimeve do të sigurohet akses i kufizuar për banorët dhe bizneset lokale, duke garantuar një koordinim të mirë me komunitetin për minimizimin e çdo shqetësimi.

Albert Vataj