Beteja me flakët, ministrat Nufi dhe Karakaçi në terren: Situatë e rëndë në Gojan, por është nën kontroll
Situata e krijuar nga zjarret në veri të vendit vijon të jetë e vështirë, por në disa zona flakët janë vënë nën kontroll falë ndërhyrjes së forcave në terren dhe nga ajri.
Në fshatin Tenë të Mirditës, ku një vatër zjarri u përhap me shpejtësi, ndërhyrja tokësore është vështirësuar për shkak të terrenit të thyer. Për të frenuar përhapjen e flakëve, në operacion u angazhuan edhe dy helikopterë të Forcave Ajrore.
Ministri i Mbrojtjes, Ermal Nufi, i pranishëm në zonë, deklaroi se situata ishte përmirësuar ndjeshëm krahasuar me dy orë më parë dhe se ndërhyrja nga ajri kishte ndihmuar në neutralizimin e rrezikut.
Një tjetër situatë problematike është raportuar në zonën e Gojanit të Madh në Pukë. Atje ka shkuar ministri i Infrastrukturës dhe Energjisë, Enea Karakaçi, i cili ka ndjekur nga afër operacionin për përballimin e zjarrit.
Karakaçi zhvilloi një takim me kryebashkiakun e Pukës, Rrok Dodaj, dhe prefekten e qarkut Shkodër, Holta Duda, me të cilët diskutoi për situatën në terren dhe koordinimin e strukturave të angazhuara në operacion.
“Në fshatin Tenë në Mirditë kishte një situatë shumë të vështirë para 2 orësh konkretisht, me shpërthimin e një vatre zjarri që ishte shumë agresive. Menjëherë kanë ardhur forcat nga bashkia, nga zjarrfikëset vendore dhe është kërkuar edhe ndërhyrja nga ajri. Kemi bërë të mundur që 2 helikopterë nga forca ajrore të vinin për të ndërhyrë, pasi për shkak të terrenit të thyer, ndërhyrja nga toka ishte shumë e vështirë. Situata është nën kontroll. Është situatë e vështirë”, tha mes të tjerash Nufi.
Lexoni edhe:
Zjarret në Pukë, kryebashkiaku Dodaj: Djegia e pyjeve akt kriminal, 15 banesa të evakuuara
Dom Gjergj Meta për zjarret: Shqetësues fakti që flakët shkaktohen nga dora e njeriut
FOTO/ Banesat në flakë, forcat zjarrfikëse në betejë me zjarrin në Gojan të Pukës
KOHA JONË SONDAZH
