Drama e refugjatëve. Kalvari nga Afganistani, Shqipëri dhe në fund drejt BE-së

E kemi thënë që Shqipëria është rruga e artë për refugjatët, të cilët e përdorin vendin tonë si mundësi për të kaluar më pas drejt BE-së. Në Pogradec u ndalua ky grup prej 6 afganësh të cilët hynë në Shqipëri ilegalisht nga kufiri i gjelbër e tashmë duhet të kthehen pas. Një emigrante e re tregon kalvarin e udhëtimit dhe dramën që përjetojnë me shpresën për një jetë më të mirë në një nga vendet e BE-së.

“Vijmë nga Greqia. Jemi nga Afganistani. Ne vijmë për një jetë më të mire. Unë jam e re, dua të shkollohem. Nuk dua ushqim, nuk dua para, dua shkollë. Nuk mund të më kuptoni. Është e vështirë. Policia na mori, por ne nuk jemi terroristë. Mami im është në Tiranë, unë jam me babin”, tha ajo.

Personat që i kishin premtuar kalimin përmes Shqipërisë u arrestuan nga policia e tashmë ëndrra e tyre u pre në mes. “Kemi 8 ditë që udhëtojmë, do shkonim në Tiranë, në Shkodër dhe më pas në një vend tjetër”, shtuan ata. Mbi një mijë refugjatë janë ndaluar nga policia dhe forcat e Frontex gjatë këtij viti ndërsa mbi 50 persona janë arrestuar për dhënie ndihmë për kalim të paligjshëm të kufirit.