DW: Vjosa-Narta në rezolutën e Parlamentit Europian

-Botuar në web e radios shtetrore gjermane DW-

Parlamenti Europian i kërkon Shqipërisë të pezullojë përkohësisht lejet, ndërtimet dhe ndërhyrjet e reja në zonat e mbrojtura, duke shprehur shqetësim për zhvillimet në Vjosë-Nartë.

Kërkesa u përfshi në rezolutën e miratuar të mërkurën (17.06.) për raportin vjetor të progresit të Shqipërisë, ndërsa protestat në Tiranë kanë hyrë në ditën e 19-të.

Amendamenti nr. 17 i rezolutës së Parlamentit Europian u kushtohet tërësisht zhvillimeve në Vjosë-Nartë. Eurodeputetët shprehin “shqetësim serioz” se ajo që po ndodh në zonën e mbrojturtregon pasojat praktike të ndryshimeve në Ligjin për Zonat e Mbrojtura dhe “rreziqet ndaj zonave me vlera të njohura ekologjike”.

Eurodeputetët thonë se po ndjekin nga afër protestat masive paqësore që po zhvillohen për këtë çështje dhe u bëjnë thirrje autoriteteve shqiptare të vendosin “menjëherë një moratorium” mbi procedurat e reja të lejeve, punimet e ndërtimit dhe ndërhyrjet zhvillimore në zonat e mbrojtura.

Sipas amendamentit moratoriumi duhet të mbetet në fuqi deri në shfuqizimin e dispozitave të papajtueshme të Ligjit për Zonat e Mbrojtura. Dokumenti thekson se kjo kërkesë është në përputhje me kriteret përmbyllëse të Kapitullit 27 dhe kërkon “përputhje të plotë me standardet e BE-së për mbrojtjen e natyrës”.

Rama mbron projektin në Zvërnec

Pas miratimit të rezolutës kryeministri Edi Rama reagoi duke e mbrojtur projektin në Zvërnec.

Sipas Ramës, amendamenti i përfshirë në rezolutë nuk ndryshon vlerësimin pozitiv që institucionet europiane kanë bërë për Shqipërinë dhe procesin e saj të integrimit.

Ai tha se protesta kishte devijuar nga kauza fillestare e mbrojtjes së mjedisit dhe ishte kthyer në një përballje politike.

“Flamingot do të mbrohen, Vjosë-Narta do të mbrohet, Zvërneci do të zhvillohet bazuar në një Vlerësim të Ndikimit në Mjedis sipas standardeve të Bashkimit Europian” – shkroi Rama në postimin e tij në rrjetet sociale.

Organizatat përshëndesin thirrjen e Parlamentit Europian

Organizatat mjedisore e përshëndetën votimin në Parlamentin Europian. “Thirrja e Parlamentit Europian për një moratorium të menjëhershëm është pikërisht ajo që nevojitet në përpjekjen tonë për të mbrojtur Vjosë-Nartën” – tha Joni Vorpsi, drejtues i Politikave dhe Advokimit në PPNEA.

“Ky votim dërgon mesazhin e qartë se nuk mund të bashkoheni me BE-në ndërsa shkatërroni ligatinat e mbrojtura dhe anashkaloni ligjet tuaja. Mbrojtja e Vjosë-Nartës dhe respektimi i Direktivave për Shpendët dhe Habitatet janë një kusht themelor për anëtarësimin në BE” – u shpreh , drejtuese e Politikave në BirdLife Europe./DW/

Rashela Shehu