Mobilizim e ndërgjegje më shumë se kurrë. Sot, kjo thirrje është njerëzore, e kupton dhe e mirëkupton cilido. Por, më shumë se kaq, e kanë perifrazuar edhe autoritetet shëndetësore që janë në nevojë. Ndihmë e mirëseardhur dhe që në këto kohë nuk mjafton, por vlen për të gjithë vullnetarët, profesionistët e studentët që i përkasin bluzave të bardha. Këtu nuk përjashtohen as njerëzit e politikës, që dje kanë pasur karrierë në shëndetësi.
Nisma ka nisur jo keq, me një përgjigje pozitive të dhënë fillimisht nga 5 depuetë: Edlira Bode, Arben Kamami, Ilir Pendavinji, Florenc Spaho dhe Klodiana Spahiu.
Në një lidhje me studion e “Ditari” në A2, Klodiana Spahiu deklaroi: “Solidaritetin që treguam gjatë kohës pas tërmetit, po e shohim dhe tani. Ne do të angazhohemi në çdo program që do të paraqitet nga Ministria e Shëndetësisë. Ne do të jemi të gatshëm që të japim ndihmën tonë kudo që të jetë nevoja”.
“Po komunikojmë me kolegët tanë në Amerikë apo Itali. Urojmë që trendi ynë të jetë shumë më i vogël dhe rastet të jenë sa më të pakta. Por, duhet të kuptojmë një gjë shumë të rëndësishme: duhet ta konsiderojmë veten si mbartës të virusit dhe të marrim masa kur hyjmë në shtëpi dhe të ruajmë të moshuarit”, shtoi Spahiu.
