Kryetari i bashkisë së Shkodrës, përmes një postimi në rrjetet sociale ka uruar “Mirëmëngjes! 
… një të diel të këndshme!
Kjo panoramë vjeshte që ai ka sjellë, tregon hirin që vesh qyteti.
Shkodra është e bukur në çdo stinë, por vjeshta e stolis atë më hijshëm dhe më poetikisht.
Ah, Shkodra në vjeshtë – një simfoni natyrale që harmonizohet me këngën e shpirtit shkodran!
Përgjatë rrugëve të një Shkodre që po rilind, brigjeve të Drinit dhe Liqenit, pemët kuqëlojnë si flakë që zbuten në prehërin e tokës. Gjethet, me ngjyra të arta, bien ngadalë si piruetat e balerinëve, duke mbushur rrugicat me tapetin e një mozaiku të përkohshëm. Në ajër ndihet një këngë e largët, ajo melodi që vetëm Shkodra mund ta ofrojë – kënga që shpalos kujtime, dashuri dhe përjetësi.
Mes pazareve të zhurmshme dhe kafeneve ku jeta përshkruhet në biseda të gjalla, ritmi i qytetit përcjell zhvillim dhe modernitet, pa e humbur traditën, nën këtë stolisje të kuqëluar vjeshte. Kalaja qëndron si rojë e heshtur, duke vështruar këtë transformim që bashkon të vjetrën me të renë. Dhe mbi të gjitha, fryma e njerëzve të saj mbetet e paprekur – mikpritëse, krenare dhe e pasur me histori.
Një çast në këtë qytet është si një poezi e shkruar me gjethet që bien, këngët që kumbonin dikur në zëra të fuqishëm, dhe me frymën e re që sjell e ardhmja.
Albert Vataj