Mediat e huaja: Mijëra para zyrës së Ramës, kërkojnë dorëheqjen e tij

Washington Post

Mbështetësit e opozitës shqiptare po mbajnë një protestë kundër qeverisë për të cilën akuzojnë se është e korruptuar dhe e lidhur me krimin e organizuar. Kështu shkruan sot “The Washington Post”, teksa raporton për protestën e kësaj të shtune para Kryeministrisë. “Mijëra mbështetës të opozitës së qendrës së djathtë, të udhëhequr nga Partia Demokratike, u mblodhën të shtunën para zyrës së kryeministrit socialist Edi Rama për të kërkuar dorëheqjen e tij”-thuhet ne shkrim. Opozita, deputetet e se cilës kanë hequr dorë nga vendet e tyre në parlament, refuzojnë të dialogojnë me Ramën, duke kërkuar një kabinet tranzitor pa atë për të përgatitur zgjedhje të parakohshme. Shtetet e Bashkuara dhe Bashkimi Evropian kanë paralajmëruar opozitën kundër përdorimit ose nxitjes së dhunës dhe për t’u ulur për bisedime. Tubimet e fundit janë bërë të dhunshme, dhe policia ka reaguar me hedhjen e gazit lotsjellës. Shqipëria shpreson të marrë miratimin e BE në qershor për nisjen e negociatave për anëtarësim”.

Deutsche Welle

Opozita e bashkuar proteston këtë të shtunë (16.03) përpara kryeministrisë, kundër qeverisë Rama, të cilën e akuzon se ka fituar zgjedhjet përmes blerjes së votave. Kërkohet qeveri tranzitore pa Ramën kryeministër.

Opozita proteston të shtunën duke kërkuar zgjedhje të parakohshme, dhe një qeveri tranzitore, pa Edi Ramën si kryeministër. Protesta zhvillohet pa simbole të partive politike. Ndërsa kryeministri Rama është shprehur se qeveria nuk mund të preket, se është mandat i popullit. Protestuesit “rrethojnë” simbolikisht institucionet në një marshim përreth tyre, duke përsëritur thirrjet “Rama ik”, dhe “E duam Shqipërinë si gjithë Europa”.

Rreth 1800 efektivë policie janë angazhuar për të garantuar mbarëvajtjen e protestës të shtunën, duke qëndruar përreth perimetrit të godinës së kryeministrisë. Kjo është protesta e 5-të e grupit opozitar, të cilat nisën me 16 Shkurt para kryeministrisë dhe vijuan me disa protesta para parlamentit. Opozita e bashkuar e akuzon se ka fituar zgjedhjet përmes blerjes së votave. Në shenjë proteste opozita ka dorëzuar mandatet parlamentare.

Të enjten, ministri i Shtetit në Ministrinë e Jashtme gjermane, Michael Roth, tha pvr Deutsche Welle, se e konsiderojmë të papërgjegjshëm bojkotin e parlamentit nga partitë opozitare. „Sepse nuk është vetëm bojkot kundër parlamentit ose i qeverisë, por edhe ndaj demokracisë. Parlamenti është vendi, ku duhet bërë debati. Ne kërkuam që këtu të ndërhyhet për zbutje. Por kam frikë se situata tashmë është shumë e helmuar.”

Ndërsa raportuesi për Shqipërinë në Komisionin e Jashtëm, Christian Schmidt mendon se edhe qeveria ka përgjegjësi për krizën. “Kjo nuk është normale. Parlamenti jeton nga debati. I takon qeverisë që të garantojë bashkëpunimin parlamentar”, tha ish-ministri gjerman për DË. Schmidt është që nga fillimi i vitit raportues për Shqipërinë në Komisionin e Jashtëm në Bundestag, njëri nga komisionet që vendos për çeljen e negociatave në BE.  Schmidt tha për DW se së shpejti planifikon të shkojë vetë në Shqipëri për t’u informuar vetë për gjendjen. “Veçanërisht dua të shoh se sa përfshihet opozita në procedurat parlamentare”, theksoi ai.