Mesazhi i Papës për Pashkët: Ndërtoni ura, jo mure

Papa Françesku të dielën apeloi ndjekësit e katolicizmit dhe udhëheqësit në botë të ndërtojnë ura dhe jo mure, dhe të mos qëndrojnë indiferente ndaj padrejtësive. Duke i cilësuar Pashkët si momentin e fillimit të një bote të re, ai iu referua konflikteve në botë dhe ofroi falje për mëkatet. Kjo ditë shënoi gjithashtu 70-vjet nga transmetimi i parë mesazhit tradicional të Papës përmes radiotelevizionit.

Duke cituar konfliktet nga Lindja e Mesme në Afrikë, Europë deri në Amerikën Jugore, kreu i Vatikanit apeloi udhëheqësit politikë dhe 1,3 miliardë besimtarët katolikë të veprojnë me altruizëm dhe të heqin dorë nga armët.

“Përballë vuajtjeve të shumta të kohës sonë, Zoti i jetës mos gjettë  njerëz të akullt e indiferentë. Na bëftë ndërtues urash e jo muresh. I Ngjalluri, që hapi dyert e varrit, i haptë edhe zemrat tona për t’iu përgjigjur kërkesave të nevojtarëve, të pambrojturve, të varfërve e të papunëve, të emigrantëve e të atyre që trokasin në portën tonë në kërkim të bukës, të strehës e të njohjes së dinjitetit të tyre”, deklaroi Papa Françesku.

Të shtunën Papa Françesku kremtoi Natën e Madhe të Pashkëve në bazilikën e Vatikanit, ku i kërkoi fetarëve t’i rezistojnë tundimit të pasurisë, suksesit dhe bollëkut dhe të jetojnë për perëndinë.