Protesta e 81-të kundër kryeministrit Edi Rama u shoqërua me mesazhe të forta nga qytetarët, të cilët deklaruan se do ta vijojnë protestën deri në dorëheqjen e kreut të qeverisë. Një jurist renditi disa prej arsyeve që kanë nxjerrë qytetarët në protestë. Ai akuzoi qeverinë se ka zëvendësuar qeverisjen me propagandën dhe se vendimmarrja publike po orientohet drejt interesave private.
“Ne jemi këtu për shtetin ligjor”, u shpreh ai, duke kritikuar mënyrën se si qeveria ka menaxhuar projekte të ndryshme, ndërsa si shembull përmendi edhe Aeroportin e Vlorës. Sipas tij, sa herë që ligji bëhet pengesë për projektet e qeverisë, ai ndryshohet, ndërsa kur një projekt nuk funksionon, përdoren ceremonitë dhe propaganda për ta paraqitur atë si sukses.
Juristi theksoi se kjo nuk përbën një formë qeverisjeje në shërbim të qytetarëve, por një model që favorizon interesa të caktuara private. “Shqipëria nuk është pronë që qeveria mund ta shesë dhe ta blejë”, deklaroi ai, duke nënvizuar vendosmërinë e protestuesve për të vijuar aksionin opozitar.
