Në ditën e 80-të të protestës, një prej qytetarëve pjesëmarrës ka përcjellë një mesazh të fortë kundër qeverisë dhe kryeministrit Edi Rama. Ai tha se do të vijojë të qëndrojë në protestë deri në rrëzimin e qeverisë, duke e akuzuar atë për korrupsion dhe keqqeverisje. “Deri sa ta rrëzojmë Edi Ramën, këtu do të rri”, u shpreh qytetari, ndërsa ngriti shqetësimin edhe për gjendjen ekonomike të pensionistëve dhe familjeve shqiptare.
Sipas tij, shumë familje mbahen nga të ardhurat që emigrantët sigurojnë jashtë vendit. Ai gjithashtu kundërshtoi politikat që, sipas tij, po cenojnë tokën dhe interesat e shqiptarëve. Qytetari tha se në Francë ka diskutuar me anëtarë të një shoqate dhe u bëri thirrje emigrantëve shqiptarë që t’i bashkohen protestës.
“Ne jemi mërgimtarë”, tha ai, duke shtuar se në rast të ndryshimit të qeverisë do të rikthehej në Shqipëri së bashku me familjen. Në përfundim, ai kërkoi dorëheqjen e kryeministrit dhe bëri thirrje për mosbindje civile, ndërsa deklaroi se personat e korruptuar duhet të përballen me drejtësinë. “Duhet ta detyrojmë të japë dorëheqje. Duhet mosbindje civile. Të korruptuarit duhet të futen në burg”, deklaroi qytetari.
