Propozimi i vendeve europiane, çereku i buxhetit për ndryshimet klimatike

Tetë vende evropiane bënë thirrje për një strategji ambicioze për trajtimin e ndryshimeve klimatike, duke kërkuar shpenzimin e çerekut të buxhetit të Bashkimit Evropian për luftimin e tyre.

Deklarata e përbashkët thotë se BE-ja duhet të ndalojë plotësisht emetimin e gazrave serrë maksimumi deri më vitin 2050, dhe u nënshkrua nga Franca, Belgjika, Danimarka, Luksemburgu, Holanda, Portugalia, Spanja dhe Suedia.

Në deklaratë bëhet me dije se ndryshimet klimatike kanë ndikim të thellë për të ardhmen e njerëzimit dhe se ato janë tashmë të dukshme, teksa shtuan se plani i tyre duhet të jetë një shembull për t’u ndjekur për vendet e tjera.

Propozimi vjen në prag të një samiti të madh të udhëheqësve evropianë, që do të nisë të enjten në Rumani, ku ndër të tjera do të diskutohet për të ardhmen e Evropës dhe strategjinë e BE-së për pesë vitet e ardhshme.