Protestat e dhunshme, humb jetën gazetarja në Irlandën e Veriut

Mbrëmjen e të enjtes në Londonderry, në Irlandën e Veriut ka pasur konfrontime mes manifestuesve nacionalistë dhe policisë, ku për pasojë ka humbur jetën një gazetare 29-vjeçare e cila po raportonte ngjarjen. Policia ka njoftuar se vrasja e gazetares Lyra McKee po hetohet si “një incident terrorist”.

Gjatë protestës janë lëshuar disa shishe molotov ndaj makinave të policisë, duke i vënë flakën. Protestat nisën pasi autoritetet kontrolluan disa shtëpi, në kuadër të hetimeve për shpërthimin e një makine në muajin janar.

Dyshohet se vrasësit e gazetares janë disidentë republikanë që i përkasin grupit “IRA”, një organizatë e armatosur që ka luftuar për pavarësinë irlandeze, por që sot nuk është me aktive. Hetuesit dyshojnë se janë të njëjtët njerëz që në muajt e shkuar kanë vendosur pako shpërthyese në Londër dhe Glasgou.