Qeveria e Britanisë së Madhe ka nisur kërkimin për një negociator të ri të Bashkimit Evropian (BE) derisa kryeministri britanik, Keir Starmer, po lëviz për të rivendosur marrëdhëniet e Britanisë me Evropën.
Zyra e kabinetit të kryeministrit po reklamon postin, i cili do të shërbejë si këshilltar kryesor i kryeministrit Starmer dhe ministrit për Marrëdhëniet me BE-në, Nick Thomas-Symonds.
Kandidati i suksesshëm do të veprojë si përfaqësues për të gjitha marrëdhëniet e Mbretërisë së Bashkuar me BE-në, duke përfshirë bisedimet e ardhshme të rinovimit mbi Marrëveshjen e Tregtisë dhe Bashkëpunimit (TCA) në vitin 2025.
I përshkruar si kritik për dhënien e një “rivendosjeje të BE-së” dhe këshillimin mbi çështjet ekonomike ndërkombëtare, negociatori do të përfaqësojë gjithashtu kryeministrin gjatë diskutimeve me bllokun evropian.
Starmer e ka bërë një prioritet rindërtimin e lidhjeve me BE-në që nga marrja e detyrës, duke u takuar me liderë kryesor evropianë si kancelari gjerman, Olaf Scholz dhe presidenti francez, Emmanuel Macron.
Starmer, lider i Partisë Laburiste, gjithashtu ishte pritës i takimit të Komunitetit Politik Evropian në Pallatin Blenheim në Oxfordshire muajin e kaluar, duke mbledhur 50 liderë nga i gjithë kontinenti.
Duke pranuar sfidat në përmirësimin e marrëdhënieve, Starmer ka mbrojtur një qasje “konstruktive” ndaj negociatave, duke e distancuar qeverinë e tij nga qasjet e kaluara.
Megjithatë, Partia Konservatore e kritikoi masën e kryeministrit Starmer.
Sekretarja e jashtme në hije, Priti Patel, paralajmëroi se laburistët do të “kapitullojnë para BE-së” dhe do të ndryshojnë rezultatet e referendumit të vitit 2016 mbi Brexit-in. /os/ ATSH