Eurodeputetja greke Afroditi Latinopoulou ka sulmuar ashpër presidenten e Komisionit Evropian, Ursula von der Leyen, gjatë debatit në Parlamentin Evropian më 16 shtator, pas fjalimit të saj për gjendjen e Bashkimit Evropian.
Latinopoulou, e cila drejton partinë greke të djathtë “Voice of Reason”, akuzoi von der Leyen për politika që, sipas saj, kanë dëmtuar ekonominë, sigurinë dhe identitetin evropian.
“Zonja von der Leyen, nuk ka raciste më të madhe ndaj evropianëve se ju, dhe për këtë ka prova. Na keni mbytur me emigrantë të paligjshëm, na keni mbytur me taksa dhe burokraci. Keni shkatërruar fermerët, blegtorët dhe peshkatarët tanë. Po mbyllni fabrikat e Evropës dhe qindra mijëra vende pune po humbasin.
Keni shkatërruar familjen tradicionale. Na impononi agjendën ‘woke’, çmendurinë e gjelbër dhe islamizimin e Evropës. Me shpenzimet tona mbani miliona emigrantë të paligjshëm që kanë shkatërruar lagjet tona, vjedhin, ngacmojnë, vrasin, dhe në fund ju u jepni atyre edhe dokumente që të mund të votojnë.
Por, si shkëmbim, na keni dhënë pipëza prej letre, tapa shishesh të ngjitura dhe parada të krenarisë (gay pride). Ju nuk jeni thjesht nxënësja më e mirë e Merkelit. E keni kaluar atë, zonja von der Leyen.
Jeni e zhytur në skandale dhe dyshime për korrupsion: PfizerGate, mesazhe të zhdukura dhe refuzim i auditimit. Dhe të gjitha këto, pa miratimin e qytetarëve evropianë.”