Ministri i Shtetit për Marrëdhëniet me Parlamentin, njëherësh drejtues politik i Partisë Socialiste për Diasporën, Taulant Balla zhvilloi një takim me kryetarin e Bashkisë Platanias, në Kretë Ioannis Malandrakis, ku diskutuan për përmirësimin e kushteve të mësimdhënies në gjuhën shqipe dhe mundësitë për bashkëpunim mes dy shteteve.
Në takim, Balla falënderoi kryetarin Malandrakis për mbështetjen e vazhdueshme ndaj komunitetit shqiptar në zonë, duke e cilësuar këtë bashki si një shembull pozitiv të integrimit dhe solidaritetit.
“Dua ta falënderoj kryetarin e Bashkisë Platanias për mbështetjen që u ka dhënë bashkatdhetarëve të mi në gjithë këto vite. Kjo bashki është një shembull i mirë. Populli grek e ka përjetuar vetë sfidën dhe vështirësitë e emigracionit. Ne mirëpresim çdo angazhim të bashkive dhe komunave në mbështetje të organizatave shqiptare që zhvillojnë mësimin në gjuhën shqipe. Ne kemi vendosur kontaktet dhe bashkia e Platanias dhe Elbasanit do të jenë pjesë e projekteve të përbashkëta sa i përket turizmit, projekteve kulturore dhe gjithçkaje tjetër në dobi të bashkatdhetarëve tanë dhe qytetarëve,” u shpreh Balla.
Nga ana tjetër, kryetari Malandrakis vlerësoi rolin aktiv të komunitetit shqiptar në zonën e Platanias, duke theksuar rëndësinë e ruajtjes së gjuhës dhe kulturës.
“Kemi një komunitet shqiptar dinamik në zonën tonë, i cili është shumë aktiv, si në anën e sipërmarrjes ashtu dhe në bujqësi. Është kënaqësi që fëmijët shqiptarë mësojnë gjuhën e nënës, si dhe ne duam që grekët të mësojnë gjuhën shqipe,” tha Malandrakis.
Ky bashkëpunim synon jo vetëm mbështetjen e komunitetit shqiptar në Kretë, por edhe forcimin e lidhjeve miqësore mes Shqipërisë dhe Greqisë, në dobi të qytetarëve të të dy vendeve.
/a.f/ ATSH